ໃນວັນທີ 30 ເມສາ 2025 ທີ່ຜ່ານມາ, ກອງປະຊຸມປຶກສາຫາລືການແກ້ໄຂໜ້າຫຼັກເວັບໄຊໂຄງການ NIPN ໄດ້ຈັດຂຶ້ນທີ່ກະຊວງແຜນການ ແລະ ການລົງທຶນ. ກອງປະຊຸມດັ່ງກ່າວ, ໄດ້ຮັບກຽດເປັນປະທານໂດຍທ່ານ ວຽງຄອນ ບົວພະຈັນ, ຮອງຫົວໜ້າສະຖາບັນຄົ້ນຄວ້າວິໄຈການພັດທະນາ ເເລະ ສູນຝຶກອົບຮົມ, ກະຊວງແຜນການ ເເລະ ການລົງທຶນ, ໄກອງປະຊຸມດັ່ງກ່າວໄດ້ຈັດຂຶ້ນເປັນເວລາເຄິ່ງມື້ ແລະ ມີຕົວແທນຈາກຂະແໜງການທີ່ກ່ຽວຂ້ອງ ແລະຜູ້ຕາງໜ້າຈາກອົງການ UNICEF ເຂົ້າຮ່ວມເພື່ອປຶກສາຫາລືກ່ຽວກັບການປັບປຸງເວັບໄຊຂອງໂຄງການ NIPN.
ການສົນທະນາໄດ້ເນັ້ນໜັກໃສ່ການກຳນົດຕົວຊີ້ວັດ, ກົນໄກການແລກປ່ຽນຂໍ້ມູນ, ໂຄງສ້າງເວັບໄຊທ໌, ແລະ ການອອກແບບທີ່ເປັນມິດກັບຜູ້ນຳໃຊ້. ຜູ້ຕາງໜ້າຈາກຂະແໜງການຕ່າງໆໄດ້ໃຫ້ຄຳເຫັນທີ່ມີປະໂຫຍກ, ລວມທັງສະເໜີຄວາມຕ້ອງການດ້ານການປະສານງານຂໍ້ມູນທີ່ມີກົນໄກຈະແຈ້ງ, ການຈັດລະບົບຖານຂໍ້ມູນໂດຍອີງຕາມຂະແໜງ, ແລະ ການເຂົ້າເຖິງຂອງຜູ້ນຳໃຊ້. ນອກຈາກນີ້, ກອງປະຊຸມຍັງໄດ້ມີການສະເໜີການໂອນຖ່າຍດ້ານການບຳລຸງຮັກສາດ້ານວິຊາການໄປຍັງ ສູນສະຖິຕິແຫ່ງຊາດ, ໂດຍ ສະຖາບັນຄົ້ນຄວ້າວິໄຈການພັດທະນາ ເເລະ ສູນຝຶກອົບຮົມ ຈະສືບຕໍ່ປະສານງານທາງດ້ານເນື້ອໃນໂດຍການຮ່ວມມືກັບຂະແໜງການຕ່າງໆທີ່ກ່ຽວຂ້ອງ.
ກອງປະຊຸມໄດ້ສິ້ນສຸດລົງດ້ວຍການຕົກລົງກ່ຽວກັບຂັ້ນຕອນໃນການຈັດຕັ້ງປະຕິບັດໃນຂັ້ນຕໍ່ໄປ: ເຊິ່ງທຸກຂະແໜງການຈະໃຫ້ການໃຫ້ຮ່ວມມືກັບສະຖາບັນຄົ້ນຄວ້າວິໄຈການພັດທະນາ ເເລະ ສູນຝຶກອົບຮົມ ໃນດ້ານເນື້ອໃນ ແລະ ຄຳແນະນຳຕ່າງໆໃນການປັບປຸງໜ້າຫຼັກຂອງເວັບໄຊ໊; ພ້ອມດຽວກັນນີ້ຍັງຈະມີການສົນທະນາຕື່ມອີກກ່ຽວກັບກາພັດທະນາການອອກແບບໃໝ່, ແລະ ແນວທາງໃນການຄຸ້ມຄອງ, ຍຸດທະສາດດ້ານຄ່າໃຊ້ຈ່າຍ ແລະ ຄວາມຍືນຍົງໃນໄລຍະຍາວ ແລະ ອື່ນໆ.
