ໜ່ວຍງານວິເຄາະຂໍ້ມູນ, ໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການໄດ້ຈັດກອງປະຊຸມວິຊາການປະຈຳສອງເດືອນຂອງໄຕມາດທີ 1 ປີ 2025 ຂຶ້ນໃນວັນທີ 31 ມັງກອນ 2025 ທີ່ຫ້ອງປະຊຸມກະຊວງແຜນການ ແລະ ການລົງທຶນ. ກອງປະຊຸມດັ່ງກ່າວໃຫ້ກຽດເປັນປະທານໂດຍທ່ານ ປອ. ສິດທິຣົດ ຣາຊະພົນ, ຫົວໜ້າສະຖາບັນຄົ້ນຄວ້າວິໄຈການພັດທະນາ, ກະຊວງແຜນການ ເເລະ ການລົງທຶນ. ຜູ້ຕາງຫນ້າຈາກຫນ່ວຍງານການວິເຄາະຂໍ້ມູນ ແລະ ນະໂຍບາຍ ລວມທັງອົງການ UNICEF ໄດ້ເຂົ້າຮ່ວມກອງປະຊຸມ.
ຈຸດປະສົງຂອງກອງປະຊຸມແມ່ນເພື່ອລາຍງານຄວາມຄືບໜ້າການຈັດຕັ້ງປະຕິບັດກິດຈະກຳຂອງໂຄງການ ສໍາລັບ 2 ໄຕມາດສຸດທ້າຍຂອງປີ 2024. ເຊິ່ງໄດ້ມີການນໍາສະເໜີຜົນສຳເລັດໃນການຈັດຕັ້ງປະຕິບັດ ລວມທັງສິ່ງທ້າທາຍເເລະບົດຮຽນທີ່ຖອດຖອນໄດ້ໃນຕະຫຼອດເວລາຂອງການຈັດຕັ້ງປະຕິບັດກິດຈະກຳ, ລວມທັງເເຜນບູລິມະສິດຂອງໂຄງການໃນປີ 202ຄ. ກອງປະຊຸມຍັງໄດ້ນຳສະເໜີໝາກຜົນຂອງການສ້າງຄວາມອາດສາມາດໃນປີ 2024 ທັງໃນຂັ້ນສູນກາງ ເເລະ ຂັ້ນເເຂວງ. ພ້ອມດຽວກັນນີ້ຍັງໄດ້ນຳສະເໜີຜົນໄດ້ຮັບເບື້ອງຕົ້ນຂອງການວິເຄາະຂອງສອງຫົວຂໍ້ຈາກການຝຶກອົບຮົມໃນປີທີ່ຜ່ານມາ, ເເລະຍັງຈະນຳສະເໜີຜົນການຄົ້ນຄ້ວາເຫຼົ່ານີ້ໃນກອງປະຊຸມເຜີຍແຜ່ຜົນການຄົ້ນຄວ້າໂພຊະນາການລະດັບຊາດໃນເດືອນມີນາ 2025 ທີ່ຈະເຖິງນີ້.
ນອກຈາກນັ້ນ, ກອງປະຊຸມຍັງໄດ້ສົນທະນາເຖິງແຜນການທາງດ້ານຄວາມຍືນຍົງຂອງໂຄງການຫຼັງປີ 2025, ເເລະໄດ້ມີການປຶກສາຫາລືກ່ຽວກັບການກະກຽມກອງປະຊຸມຄະນະຊີ້ນຳລວມໂຄງການທີ່ຈະຈັດຂຶ້ນໃນທ້າຍເດືອນນີ້, ເຊັ່ນດຽວກັນກັບການກະກຽມສໍາລັບກອງປະຊຸມວັນເຜີຍແຜ່ຜົນການຄົ້ນຄວ້າລະດັບຊາດກ່ຽວກັບວຽກງານທາງດ້ານໂພຊະນາການ.
ກອງປະຊຸມໄດ້ປິດລົງດ້ວຍຜົນສຳເລັດ ເເລະກຳນົດເອົາຫຼາຍບັນຫາທີ່ສຳຄັນທີ່ຈະນໍາສະເໜີໃນກອງປະຊຸມຄະນະຊີ້ນຳລວມໂຄງການເພື່ອຮັບຮອງ ແລະ ຜັນຂະຫຍາຍການຈັດຕັ້ງປະຕິບັດໃນປີ 2025 ທັງໃນລະດັບຊາດ ແລະ ໃນຂັ້ນເເຂວງ.