ສະຫຼຸບຫຍໍ້ກອງປະຊຸມເຜີຍແຜ່ຜົນໄດ້ຮັບຂອງໂຄງການ ສ້າງຖານຂໍ້ມູນແຫ່ງຊາດດ້ານໂພຊະນາການ (NIPN). ໃຫ້ແກ່ຜູ້ແທນສະພາປະຊາຊົນຂັ້ນແຂວງ ພາກເໜືອ ແລະ ພາກກາງ ທີ່ ພະແນກແຜນການ ແລະ ການລົງທຶນ, ແຂວງ ອຸດົມໄຊ.
ກອງປະຊຸມເຜີຍແຜ່ຜົນໄດ້ຮັບຂອງໂຄງການ NIPN ໃຫ້ແກ່ຜູ້ແທນສະພາປະຊາຊົນຂັ້ນແຂວງ ພາກເໜືອ ແລະ ພາກກາງ ໄດ້ຈັດຂຶ້ນໃນວັນທີ່ 4 ມິຖຸນາ 2025, ພາຍໃຕ້ການເປັນປະທານຂອງ ທ່ານ ຄໍາເຜີຍ ງອນວັນຄໍາ, ກໍາມະການປະຈໍາພັກແຂວງ, ຮອງປະທານສະພາປະຊາຊົນຂັ້ນແຂວງອຸດົມໄຊ, ປະທານກອງປະຊຸມ. ເປັນປະທານຮ່ວມ ໂດຍ ທ່ານ ປອ. ນາງ ແກ້ວວິວອນ ອຸດທະຈັກ, ຮອງປະທານ ສະຖາບັນວິທະຍາສາດ ເສດຖະກິດ ແລະ ສັງຄົມແຫ່ງຊາດ (ສວສສຊ). ກອງປະຊຸມຄັ້ງນີ້ມີ ຜູ້ແທນສະພາປະຊາຊົນຂັ້ນແຂວງ 2 ທ່ານ ແລະ ການນໍາສາທາລະນະສຸກແຂວງ 1 ທ່ານ ຂອງແຕ່ລະແຂວງ ຈາກ 9 ແຂວງ ໄດ້ເຂົ້າຮ່ວມ. ຜູ້ຕາງໜ້າຈາກບັນດາຂະແໜງການຫຼັກ (ສາທາລະນະສຸກ, ກະສິກໍາ, ສຶກສາ, ແຜນການ ແລະ ການເງິນ) ພ້ອມດ້ວຍ ອົງການຈັດຕັ້ງມະຫາຊົນຄື: ສະຫະພັນແມ່ຍິງລາວ, ສູນກາງຊາວໜຸ່ມ ແລະ ສະຫະພັນກຳມະບານລາວ, ຕະຫຼອດເຖິງອົງການທີ່ບໍ່ຂຶ້ນກັບລັດຖະບານ (NGO) ໃນແຂວງເຈົ້າພາບ ກໍໄດ້ເຂົ້າຮ່ວມ. ມີຜູ້ເຂົ້າຮ່ວມທັງໝົດປະມານ 60 ທ່ານ.
ກອງປະຊຸມດັ່ງກ່າວໄດ້ຮັບການອຳນວຍຄວາມສະດວກຈາກບັນດາສະຖາບັນຂັ້ນສູນກາງຄື: ສະຖາບັນວິທະຍາສາດ ເສດຖະກິດ ແລະ ສັງຄົມແຫ່ງຊາດ (ສວສສຊ), ກະຊວງແຜນການ ແລະ ການລົງທຶນ, ສູນໂພຊະນາການ ພ້ອມທັງ ທີມງານວິເຄາະນະໂຍບາຍ ແລະ ວິເຄາະຂໍ້ມູນ ຂອງໂຄງການສ້າງຖານຂໍ້ມູນແຫ່ງຊາດດ້ານໂພຊະນາການ (NIPN).
ໄດ້ມີການນໍາສະເໜີຫົວຂໍ້ດັ່ງຕໍ່ໄປນີ້ຕໍ່ກອງປະຊຸມ:
- ຄວາມໝາຍ ຄວາມສໍາຄັນ ຂອງໂພຊະນາການ ແລະ ພາລະບົດບາດຂອງຜູ້ແທນສະພາປະຊາຊົນຂັ້ນແຂວງໃນການສົ່ງເສີມວາລະໂພຊະນາການ ນໍາສະເໜີໂດຍ ທ່ານ ນາງ ອຳພອນ ທອງມະນີໄລ , ພະນັກງານວິຊາການ, ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ (ສຄນສ), ສະຖາບັນວິທະຍາສາດ ເສດຖະກິດ ແລະ ສັງຄົມແຫ່ງຊາດ (ສວສສຊ). ເພື່ອຢາກເນັ້ນເຖິງ ຄວາມໝາຍ ແລະ ຄວາມສໍາຄັນຂອງໂພຊະນາການ ພ້ອມທັງ ຜົນກະທົບທີ່ຈະຕາມມາ ເນື່ອງຈາກພາວະການຂາດສານອາຫານ. ພວກເຮົາເປັນແກນນໍາສໍາຄັນ ໃນການສົ່ງເສີມວາລະໂພຊະນາການຂອງແຂວງ ໂດຍການ ເຊື່ອມສານວຽກນີ້ເຂົ້າໄປໃນແຜນງານປົກະຕິຂອງບັນດສາຂະແໜງການທີ່ກ່ຽວຂ້ອງໄດ້ແນວໃດ ເພື່ອຄວາມເປັນເຈົ້າການ ແລະ ໃຫ້ວຽກງານມີຄວາມຍືນຍົງ.
- ພາບລວມໂດຍຫຍໍ້ ແລະ ຜົນສໍາເລັດຂອງໂຄງການ NIPN ແລະ ສາຍວີດີໂອ ໂຄງການ NIPN ນໍາສະເໜີໂດຍ ທ່ານ ວຽງຄອນ ບົວພະຈັນ, ຮອງຫົວໜ້າສະຖາບັນຄົ້ນຄ້ວາວິໄຈການພັດທະນາ, ກະຊວງແຜນການ ແລະ ການລົງທຶນ. ເຊິ່ງເປັນການການນໍາສະເໜີພາບລວມ, ບົດບາດ, ໂຄງຮ່າງກັນຈັດຕັ້ງ ແລະ ຜົນສໍາເລັດ ຂອງໂຄງການ NIPN, ພ້ອມທັງ ສາຍວິດີໂອສັ້ນກ່ຽວກັບໂຄງການ NIPN ໄດ້ນຳສະເໜີໂດຍ ທ່ານ ວຽງຄອນ ບົວພາຈັນ , ຮອງຫົວໜ້າສະຖາບັນຄົ້ນຄ້ວາການພັດທະນາ, ກະຊວງແຜນການ ແລະ ການລົງທຶນ. ພາບລວມຂອງ NIPN, ລວມທັງໂຄງປະກອບການຈັດຕັ້ງ, ບົດບາດ ແລະ ຜົນສໍາເລັດໃນໄລຍະຫຼາຍປີຜ່ານມາ.
- NIPN ເວບໄຊ໌, ແລະ ສາທິດກ່ຽວກັບກະດານຂ່າວຂອງໂຄງການ NIPN ແລະ ສະພາບໂພຊະນາການໃນຂັ້ນແຂວງ (ຜົນໄດ້ຮັບການຄົ້ນຄ້ວາຂອງ ການສຳຫຼວດດັດຊະນີໝາຍສັງຄົມລາວ, NIPN ແລະການຄົ້ນຄ້ວາອື່ນໆດ້ານໂພຊະນາການ). ການສົມທຽບກັບພາກ / ພາກເໜືອ. ນໍາສະເໜີໂດຍ ທ່ານ ພຸດທະຈັນ ຕົ້ນແພງ, ຫົວໜ້າພະແນກ, ສະຖາບັນຄົ້ນຄ້ວາວິໄຈການພັດທະນາ, ກະຊວງແຜນການ ແລະ ການລົງທຶນ. ເຊິ່ງເປັນ ການວິເຄາະສະພາບໂພຊະນາການໃນຂັ້ນແຂວງໂດຍອີງຕາມ ຜົນການຄົ້ນຄວ້າຈາກການສຳຫຼວດດັດຊະນີໝາຍສັງຄົມລາວ (LSIS) ໃນຄັ້ງທີ່ຜ່ານມາ ໂດຍເນັ້ນໃສ່ຕົວຊີ້ວັດຫຼັກທີ່ຕິດພັນກັບດ້ານໂພຊະນາການ ເພື່ອຈະເປັນຫຼັກຖານອ້າງອີງໃນການວາງແຜນຂອງແຕ່ລະແຂວງໃຫ້ສອດຄ່ອງ.
- ສະຫຼຸບຜົນໄດ້ຮັບ ປະເດັນສໍາຄັນ ແລະ ຂໍ້ສະ ເໜີແນະນະໂຍບາຍດ້ານໂພຊະນາການຂອງແຂວງ ນໍາສະເໜີໂດຍ ທ່ານ ນາງ ມະລິ ແສງຄໍາຢອງ, ວິຊາການ, ສຄນສ, ສວສສຊ. ເຊິ່ງເປັນການວິເຄາະສະພາບໂພຊະນາການຂອງແຕ່ລະແຂວງ ພ້ອມທັງບັນດາຂໍ້ສະເໜີແນະດ້ານນະໂຍບາຍ ແລະ ແຜນງານ, ເພື່ອເປັນບ່ອນອີງໃນການສ້າງແຜນຈັດຕັ້ງປະຕິບັດໃຫ້ສອດຄ່ອງ. ເຊິ່ງຫົວຂໍ້ດັ່ງກ່າວນີ້ຈະເຊື່ອມໂຍງກັບການເຮັດກິດຈະກໍາກຸ່ມຂອງແຕ່ລະແຂວງ.
ຫຼັງຈາກນັ້ນ, ອານຸຍາດໃຫ້ຜູ້ເຂົ້າຮ່ວມໄດ້ສົນທະນາ ແລະ ປະກອບຄໍາຄິດ-ເຫັນຢ່າງເປີດກ້ວາງ. ໂດຍທົ່ວໄປແລ້ວ, ກໍມີຄວາມເປັນເອກະພາບກັບບົດທີ່ໄດ້ນໍາສະເໜີ ແລະ ຮັບຮູ້ວ່າ ການແກ້ໄຂພາວະການຂາດສານອາຫານ ຕ້ອງເປັນການຮ່ວມແຮງຮ່ວມໃຈຂອງຫຼາຍຂະແໜງການ ແລະ ຕ້ອງໄດ້ຮັບການສະໜັບສະໜູນຢ່າງຈິງຈັງຈາກລັດຖະບານ ແລະ ບັນດາຜູ້ມີສ່ວນຮ່ວມທັງໝົດ ໃນທຸກຂັ້ນ. ພາວະການຂາດສານອາຫານຍັງ ກ່ຽວຂ້ອງກັບປັດໄຈຕ່າງໆເຊັ່ນ: ເສດຖະກິດ-ສັງຄົມ, ບໍ່ມີການຄໍ້າປະກັນດ້ານສະບຽງອາຫານ, ຄວາມທຸກຍາກ, ການລົງທຶນ, ການເຂົ້າເຖິງການບໍລິການ ດ້ານສຸຂະພາບ/ໂພຊະນາການ ແລະ ການສຶກສາ, ແຮງງານ ຕະຫຼອດເພິງການແຕ່ງງານ ແລະ ການຖືພາກ່ອນໄວ ອັນຄວນ.
ບັນດາຂໍ້ມູນທີ່ມີຫຼັກຖານອ້າງອີງຊັດເຈນ ສະເພາະຂອງແຕ່ລະແຂວງ ຈະມີອິດທິພົນຕໍ່ອໍານາດການປົກຄອງຂັ້ນແຂວງ ກໍຄື ສະພາປະຊາຊົນຂັ້ນແຂວງ ແລະ ບັນດາຜູ້ມີສ່ວນຮ່ວມອື່ນໆ ໃນການສະໜັບສະໜູນວາລະໂພຊະນາການ ເພື່ອປັບປຸງຊີວິດການເປັນຢູ່ທີ່ດີທາງດ້ານໂພຊະນາການຂອງປະຊາຊົນໃນທົ່ວແຂວງຂອງທ່ານ. ທ່ານຍັງມີບົດບາດສຳຄັນ ໃນການແກ້ໄຂບັນຫາເຫຼົ່ານີ້ ແລະ ພິຈາລະນາ ແລະ/ຫຼື ຮັບຮອງເອົາການສະໜັບສະໜູນທຶນ ໃນການເພີ່ມການລົງທຶນ ດ້ານໂພຊະນາການ ໂດຍການເຊື່ອມສານວຽກງານໂພຊະນາການເຂົ້າໃນແຜນພັດທະນາຂອງແຂວງ ຕະຫຼອດເຖິງ ແຜນການຂອງບັນດາຂະແໜງການ ທັງນີ້ກໍແມ່ນເພື່ອຄວາມເປັນເຈົ້າການ ແລະ ໃຫ້ມີຄວາມຍືນຍົງ.
ເພື່ອໃຫ້ໄດ້ຂໍ້ມູນລະອຽດ ແລະ ຄວາມມຸ້ງໝັ້ນຈາກຜູ້ເຂົ້າຮ່ວມ, ຈິ່ງໄດ້ດໍເນີນກິດຈະກໍາກຸ່ມຂອງແຕ່ລະແຂວງ ໃນການກໍານົດບັນດາກິດຈະກໍາຫຼັກ ເພື່ອຈະສາມາດນໍາໄປຈັດຕັ້ງປະຕິບັດໄດ້ ໂດຍອີງໃສ່ ບັນຫາຫຼັກ ແລະ ຂໍ້ສະເໜີແນະນະໂຍບາຍດ້ານໂພຊະນາການຂອງແຂວງສະເພາະ. ນອກຈາກ ການກຳນົດແຜນການດຳເນີນງານແລ້ວ, ຍັງໄດ້ລະບຸກອບເວລາ ແລະ ພາກສ່ວນທີ່ຮັບຜິດຊອບ ໂດຍອີງໃສ່ 3 ຂົງເຂດຫຼັກເຊັ່ນ: ສະພາບແວດລ້ອມທີ່ເອື້ອອໍານວຍ, ໂພຊະນາການທາງກົງ ແລະ ໂພຊະນາການທາງອ້ອມ ສຳລັບແຕ່ລະແຂວງ. ຫຼັງຈາກນັ້ນ ແມ່ນການນຳສະເໜີຜົນໄດ້ຮັບຂອງກຸ່ມ.
ພ້ອມກັນນັ້ນ, ຍັງໄດ້ນໍາສະເໜີ ບາດກ້າວໃນຕໍ່ໜ້າ / ສິ່ງສໍາຄັນທີ່ຄວນຈົດຈໍາ / ການນໍາໄປຈັດຕັ້ງປະຕິບັດ ໂດຍ ທ່ານ ອຸສະຫວັນ ທ່ຽງເທບວົງສາ, ຫົວໜ້າ ສະຖາບັນຄົ້ນຄວ້ານະໂຍບາຍເສດຖະກິດ-ສັງຄົມ (ສຄນສ), ສະຖາບັນວິທະຍາສາດ ເສດຖະກິດ ແລະ ສັງຄົມແຫ່ງຊາດ (ສວສສຊ) ເພື່ອກະຕຸ້ນໃຫ້ຜູ້ເຂົ້າຮ່ວມ ໃຫ້ບຸລິມະສິດແກ່ວຽກງານໂພຊະນາການ. ເຊິ່ງມີລະລະອຽດດັ່ງຕໍ່ໄປນີ້:
- ເພີ່ມທະວີການລົງທຶນໃນບັນດາໂຄງການທີ່ມີຄວາມອ່ອນໄຫວດ້ານໂພຊະນາການ ແລະ ສະເພາະ.
- ການເຊື່ອມໂຍງຕົວຊີ້ວັດດ້ານໂພຊະນາການ ໃນການສໍາຫຼວດດ້ານ ສາທາລະນະສຸກ, ສຶກສາ, ກະສິກໍາ ແລະ ຄວາມທຸກຍາກ ໃນວົງກ້ວາງຂຶ້ນ ຕະຫຼອດເຖິງ ແຜນການ 5 ປີຂອງແຂວງ, ແຜນງານຂອງຂະແໜງການ ແລະ ແຜນການ ແລະ ງົບປະມານຂອງແຂວງ ໃຫ້ສອດຄ່ອງກັບ ຍຸດທະສາດແຫ່ງຊາດດ້ານໂພຊະນາການ ແລະ ແຜນປະຕິບັດງານແຫ່ງຊາດດ້ານໂພຊະນາການ (NPAN).
- ເສີມສ້າງການຄຸ້ມຄອງ ແລະ ການປະສານງານ ດ້ານໂພຊະນາການ ແບບຫຼາຍຂະແໜງການ.
- ສະໜັບສະໜູນງົບປະມານ ໃຫ້ຂັ້ນແຂວງ ໂດຍສະເພາະແມ່ນການຄົ້ນຄວ້າກ່ຽວກັບບັນດາປັດໄຈຂອງພາວະການຂາດອາຫານໃນທ້ອງຖິ່ນ.
- ນຳໃຊ້ຂໍ້ມູນ ແລະ ຫຼັກຖານດ້ານໂພຊະນາການ (ຕົວຢ່າງ: ບ່ອນທີ່ມີອັດຕາສູງດ້ານ ພາວະການຂາດອາຫານຊໍາເຮື້ອ, ຮູບແບບການຮັບປະທານອາຫານ, ການແຕ່ງງານກ່ອນໄວອັນຄວນ) ເພື່ອຈະແຈ້ງຂໍ້ມູນໃນການຈັດສັນຊັບພະຍາກອນຢ່າງສະເໝີພາບກັນ ພາຍໃນງົບປະມານຂອງແຂວງ.
- ຜັກດັນໃຫ້ມີງົບປະມານສະເພາະ ສໍາລັບບັນດາແຜນງານດ້ານໂພຊະນາການທາງອ້ອມ ໃນຂະແໜງ ກະສິກຳ ແລະ ການສຶກສາ ຕະຫຼອດເຖິງ ແຜນງານດ້ານໂພຊະນາການໂດຍກົງຂອງຂະແໜງສາທາລະນະສຸກ.
- ນະໂຍບາຍສະໜັບສະໜູນ ທີ່ໄດ້ເຊື່ອມກິດຈະກໍາ ການສື່ສານເພື່ອປ່ຽນແປງພຶດຕິກໍາທາງສັງຄົມ (SBCC) ເຂົ້າໃນໂຮງຮຽນ, ສຸກສາລາ ແລະ ໂຄງການອື່ນໆທີ່ມີຢູ່.
ທ່ານປະທານຮ່ວມໄດ້ສະຫຼຸບວ່າ ເຖິງວ່າພວກເຮົາຈະມີການຮ່ວມມືກັນທີ່ດີແລ້ວກໍຕາມ ແຕ່ການແກ້ໄຂບັນຫາໂພຊະນາການຈະຕ້ອງໄດ້ເສີມສ້າງດ້ານການຕິດຕາມ, ກວດກາ ແລະ ສະໜັບສະໜູນ ໃນການວາງແຜນໃຫ້ເປັນຮູບປະທໍາຫຼາຍຂຶ້ນ, ຕ້ອງມີແຫຼ່ງຊັບພະຍາກອນມະນຸດ ແລະ ງົບປະມານ ແລະ ຄວາມຮັບຜິດຊອບ ໃນທຸກຂະແໜງການ.
ໃນທ້າຍນີ້, ທ່ານປະທານໄດ້ເນັ້ນຕື່ມວ່າ: ເພື່ອເຮັດໃຫ້ກອງປະຊຸມເຜີຍແຜ່ຄັ້ງນີ້ມີປະສິດຕິຜົນ ແລະ ບັນລຸເປົ້າໝາຍສູງສຸດ, ຕ້ອງຮັບປະກັນວ່າໂພຊະນາການທີ່ສໍາຄັນ ໄດ້ເຊື່ອມສານເຂົ້າໃນແຜນການ 5 ປີ ຂອງແຂວງ ເພື່ອສົ່ງເສີມໂພຊະນາການໃນທົ່ວແຂວງ ພ້ອມທັງ ປັບປຸງກົນໄກການປະສານງານແບບຫຼາຍຂະແໜງການໃຫ້ດີຂຶ້ນ. ຂໍຂອບໃຈຜູ້ເຂົ້າຮ່ວມທຸກທ່ານທີ່ສະລະເວລາ ແລະ ທຸ້ເທຄວາມພະຍາຍາມຂອງທ່ານໃນການປະກອບຄໍາຄິດ-ຄໍາເຫັນ, ພ້ອມທັງ EU ແລະ UNICEF ໃນການສະໜັບສະໜູນກອງປະຊຸມຄັ້ງນີ້.