ການຝຶກອົບຮົມເຂັ້ມຄັ້ງທີ 2 ປະຈຳປີ 2024 ໜ່ວຍງານວິເຄາະຂໍ້ມູນ

ມ.ຖ. 11, 2024

ການຝຶກອົບຮົມຄັ້ງທີ 2 ປະຈຳໄຕມາດທີ 2, ປີ 2024 ຂອງໜ່ວຍວິເຄາະຂໍ້ມູນ ໄດ້ຈັດຂຶ້ນໃນລະຫວ່າງວັນທີ 28 ພຶດສະພາ ຫາ 31 ພຶດສະພາ 2024 ທີ່ໂຮງແຮມ ຝຶກປະຕິບັດ, ເມືອງວັງວຽງ, ແຂວງວຽງຈັນ. ການຝຶກອົບຮົມຄັ້ງນີ້ ໄດ້ເນັ້ນໃສ່ການປະຕິບັດຕົວຈິງ, ໂດຍສະເພາະແມ່ນການເນັ້ນໜັກເຖິງຂະບວນການດຳເນີນການຄົ້ນຄວ້າ. ຜູ້​ເຂົ້າ​ຮ່ວມ​ໄດ້​ແບ່ງອອກເປັນ​ກຸ່ມ​​ເຊິ່ງປະກອບດ້ວຍຜູ້ເຂົ້າຮ່ວມຈາກຂະ​ແໜງ​ການ​ຕ່າງໆ ເພື່ອ​ຊຸກ​ຍູ້​ການ​ຮ່ວມ​ມື​ທາງດ້ານ​ວິ​ຊາ​ການ. ໂດຍແຕ່ລະກຸ່ມແມ່ນນໍາພາໂດຍຫົວໜ້າກຸ່ມ, ທີ່ໄດ້ຮັບການຄັດເລືອກເພື່ອເປັນຄູຝຶກສໍາລັບການຝຶກອົບຮົມຂັ້ນເເຂວງໃນອະນາຄົດ.

ການຝຶກອົບຮົມໄດ້ສຸມໃສ່ວິທີການດຳເນີນການຄົ້ນຄ້ວາ, ການສ້າງຄໍາຖາມ, ການທົບທວນທິດສະດີ, ແລະການຄັດເລືອກຊຸດຂໍ້ມູນ. ແຕ່ລະກຸ່ມໄດ້ຖືກມອບຫມາຍໃຫ້ດຳເນີນການກຳນົດຫົວຂໍ້ການຄົ້ນຄວ້າຂອງຕົນເອງ. ໃນການຝຶກອົບຮົມຄັ້ງຕໍ່ໄປ, ແມ່ນຈະໄດ້ດຳການວິເຄາະຂໍ້ມູນແລະນໍາສະເຫນີຜົນໄດ້ຮັບ. ເຊິ່ງບາງຫົວຂໍ້ທີ່ໜ້າສົນໃຈອາດຈະຖືກຄັດເລືອກໄປນຳສະເໜີໃນກອງປະຊຸມເຜີຍແຜ່ຜົນການຄົ້ນຄວ້າ.

ທ່ານ ວຽງຄອນ ບົວພະຈັນ, ຫົວໜ້າພະແນກ ຄົ້ນຄວ້ານະໂຍບາຍສັງຄົມ ແລະ ຫຼຸດຜ່ອນຄວາມທຸກຍາກ, ແລະ ທ່ານ ດຣ ນາງ Nelofar Akthar Shiek, ທີ່ປຶກສາການວິເຄາະຂໍ້ມູນຂອງ ໂຄງການ NIPN ໄດ້ເປັນປະທານຮ່ວມໃນການເປີດກອງປະຊຸມຝຶກອົບຮົມ. ພ້ອມດຽວກັນນີ້ ໃນພິທີປິດກອງປະຊຸມ, ທ່ານ ປອ ສິດທິຣົດ ຣາຊະພົນ, ຫົວໜ້າສະຖາບັນຄົ້ນຄວ້າວິໄຈການການພັດທະນາ,ກະຊວງແຜນການເເລະການລົງທຶນ ໄດ້ເນັ້ນໜັກເຖິງຄວາມສຳຄັນຂອງການຝຶກອົບຮົມເຊິ່ງບໍ່ພຽງແຕ່ເປັນການເສີມຂະຫຍາຍຄວາມອາດສາມາດຂອງຜູ້ເຂົ້າຮ່ວມເທົ່ານັ້ນ, ແຕ່ຍັງເປັນການກະກຽມຄວາມພ້ອມຂອງຫົວໜ້າກຸ່ມເພື່ອກ້າວໄປເຖິງພາລະບົດບາດຂອງຕົນທີ່ຈະກ້າວໄປເປັນຄູຝຶກຂັ້ນເເຂວງໃນອະນາຄົດ.

Related posts