ໃນລະຫວ່າງວັນທີ 11-15 ພະຈິກ 2024 ທີ່ຜ່ານມາ, ຄະນະຜູ້ແທນໂຄງການ NIPN ຈາກປະເທດເຄນຢາ, ເອທິໂອເປຍ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ເພື່ອແລກປ່ຽນວິທີການຈັດຕັ້ງປະຕິບັດໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ໂດຍສະເພາະເເມ່ນການຂະຫຍາຍໂຄງການລົງສູ່ຂັ້ນເເຂວງ. ການຢ້ຽມຢາມດັ່ງກ່າວໄດ້ເປີດໂອກາດອັນພິເສດໃຫ້ບັນດາຜູ້ເຂົ້າຮ່ວມໄດ້ແລກປ່ຽນຄວາມເຂົ້າໃຈກ່ຽວກັບການເພີ່ມທະວີການຄຸ້ມຄອງວຽກງານທາງດ້ານໂພຊະນາການ ແລະ ການປັບປຸງລະບົບຂໍ້ມູນຂ່າວສານ, ໂດຍເນັ້ນໃສ່ການນໍາໃຊ້ຂໍ້ມູນເພື່ອຊຸກຍູ້ຜົນໄດ້ຮັບດ້ານໂພຊະນາການທີ່ດີຂຶ້ນ ທັງໃນລະດັບຊາດ ແລະ ໃນຂັ້ນເເຂວງ.
ການຢ້ຽມຢາມໄດ້ເລີ່ມຕົ້ນດ້ວຍການຕ້ອນຮັບຢ່າງອົບອຸ່ນທີ່ນະຄອນຫຼວງວຽງຈັນ, ເຊິ່ງບັນດາຜູ້ເຂົ້າຮ່ວມໄດ້ຮັບການແນະນໍາກ່ຽວກັບໂຄງການໂພຊະນາການຂອງ ສປປ ລາວ ໃນລະຫວ່າງການຢ້ຽມຢາມ ແລະ ເຮັດວຽກຢູ່ຫ້ອງການອົງການ UNICEF ປະຈຳ ສປປ ລາວ. ຈຸດສຳຄັນຂອງການຢ້ຽມຢາມໃນຄັ້ງນີ້ແມ່ນມີຂຶ້ນໃນມື້ທີ 2, ເມື່ອຄະນະຜູ້ແທນໄດ້ເດີນທາງໄປຢ້ຽມຢາມແຂວງສາລະວັນ ເພື່ອແນໃສ່ສະເໜີຂໍ້ມູນໃນການປະຕິບັດໂຄງການ NIPN ຢູ່ໃນຂັ້ນເເຂວງ. ໂອກາດສຳຄັນອັນໜຶ່ງຂອງການຢ້ຽມຢາມຄັ້ງນີ້ ແມ່ນການພົບປະແລກປ່ຽນຄຳຄິດຄຳເຫັນກັບທ່ານຮອງເຈົ້າແຂວງໆ ສາລະວັນ, ເຊິ່ງໄດ້ຍົກໃຫ້ເຫັນເຖິງຄວາມສຳຄັນຂອງການນຳພາ ແລະ ການມີສ່ວນຮ່ວມຂອງອຳນາດການປົກຄອງທ້ອງຖິ່ນ ໃນການຜັນຂະຫຍາຍລະບົບຂໍ້ມູນຂ່າວສານດ້ານໂພຊະນາການໃຫ້ປະສົບຜົນສຳເລັດໃນຂັ້ນເເຂວງ. ໃນກອງປະຊຸມດັ່ງກ່າວ, ທ່ານຮອງເຈົ້າແຂວງໄດ້ນຳສະເໜີກ່ຽວກັບຄວາມຄືບຫນ້າຂອງແຂວງກັບການຈັດຕັ້ງປະຕິບັດໂຄງການ NIPN, ໂດຍເນັ້ນຫນັກເຖິງບົດບາດສໍາຄັນຂອງການສະຫນັບສະ ຫນູນຂອງລັດຖະບານໃນການຮັບປະກັນດ້ານຂໍ້ມູນໂພຊະນາການເເມ່ນສາມາດເຂົ້າເຖິງຜູ້ທີ່ຕັດສິນໃຈ ທີ່ສາມາດຈັດຕັ້ງປະຕິບັດເພື່ອປັບປຸງຜົນໄດ້ຮັບທາງດ້ານສຸຂະພາບ ເເລະ ໂພຊະນາການ.
ພາຍຫຼັງການພົບປະກັບທ່ານຮອງເຈົ້າແຂວງ, ບັນດາຜູ້ແທນໄດ້ໄປຢ້ຽມຢາມສະຖານທີ່ໃຫ້ບໍລິການສາທາລະນະສຸກຂອງເເຂວງຈຳນວນໜຶ່ງ ເພື່ອສັງເກດການເກັບກຳຂໍ້ມູນ, ຄຸ້ມຄອງ ແລະ ນຳໃຊ້ສຳລັບວຽກງານໂພຊະນາການ. ປະສົບການດັ່ງກ່າວຈະເປັນບົດຮຽນອັນລ້ຳຄ່າໃນການແກ້ໄຂສິ່ງທ້າທາຍໃນການຈັດຕັ້ງປະຕິບັດການເກັບກຳຂໍ້ມູນທີ່ຖືກຕ້ອງຢູ່ຂັ້ນແຂວງ ແລະ ຂັ້ນເມືອງ, ພ້ອມທັງວິທີການນຳໃຊ້ຂໍ້ມູນດັ່ງກ່າວເພື່ອເປັນບ່ອນອີງໃນການວາງມາດຕະການດ້ານໂພຊະນາການ. ການລົງຢ້ຽມຢາມພາກສະໜາມເເມ່ນລວມທັງການສົນທະນາກ່ຽວກັບວິທີການຈັດການກັບບັນຫາອື່ນໆທີ່ກ່ຽວຂ້ອງ ເຊັ່ນ: ຂໍ້ຈຳກັດດ້ານຊັບພະຍາກອນ ແລະ ບັນຫາການປະສານງານລະຫວ່າງຂະແໜງການຕ່າງໆ ເພື່ອເຮັດໃຫ້ສາມາດເກັບກຳຂໍ້ມູນທີ່ມີຢູ່ໃຫ້ໄດ້ຫຼາຍທີ່ສຸດ.
ມື້ທີສາມຂອງການແລກປ່ຽນໄດ້ເນັ້ນໃສ່ການສົນທະນາແລະການນໍາສະເຫນີທີ່ຈັດຂຶ້ນທີ່ເມືອງປາກເຊ, ເຊິ່ງທີມຈາກ ສປປ ລາວໄດ້ນຳສະເໜີພາບລວມຂອງການຈັດຕັ້ງປະຕິບັດກິດຈະກໍາ NIPN , ພ້ອມດ້ວຍການນໍາສະເຫນີຈາກທີມງານຂອງປະເທດ Kenya ແລະ Ethiopia. ກອງປະຊຸມດັ່ງກ່າວໄດ້ເປີດໂອກາດໃຫ້ຜູ້ເຂົ້າຮ່ວມນຳສະເໜີເຖິງປະສົບການຂອງປະເທດຂອງຕົນ ແລະ ແບ່ງປັນບົດຮຽນຈາກການຈັດຕັ້ງປະຕິບັດໂຄງການ NIPN ໃນຂັ້ນເເຂວງ. ຜ່ານການພົບປະແລກປ່ຽນດັ່ງກ່າວ, ບັນດາຜູ້ແທນໄດ້ຮັບຄວາມເຂົ້າໃຈຢ່າງເລິກເຊິ່ງກ່ຽວກັບບັນດາສິ່ງທ້າທາຍ ແລະ ຜົນສຳເລັດລວມທັງຂໍ້ຄົງຄ້າງທີ່ແຕ່ລະປະເທດປະເຊີນໜ້າ ແລະ ກຳນົດກາລະໂອກາດໃນການປັບປຸງລະບົບຂອງຕົນ.
ໃນມື້ທີສີ່, ຄະນະຜູ້ເຂົ້າຮ່ວມໄດ້ຮ່ວມກິດຈະກໍາກ່ຽວກັບການພັດທະນາຍຸດທະສາດການຈັດຕັ້ງປະຕິບັດເພື່ອເສີມສ້າງໂຄງການ NIPN ລະດັບຊາດ. ພ້ອມດຽວກັນນີ້ຍັງມີການເເບ່ງກຸ່ມແບບປະສົມປະສານລະຫວ່າງຄະນະຜູ້ແທນຈາກເຄນຢາ, ເອທິໂອເປຍ ແລະ ສປປ ລາວ ໃນການເຮັດວຽກຮ່ວມກັນເພື່ອກໍານົດສິ່ງທ້າທາຍທີ່ສໍາຄັນ ແລະການປະຕິບັດທີ່ດີທີ່ສຸດໃນຂົງເຂດຕ່າງໆ ເຊັ່ນ: ຂະບວນການຕັດສິນໃຈ, ການຮ່ວມມືລະຫວ່າງຂະແໜງການ, ແລະການສົ່ງເສີມດ້ານໂພຊະນາການ. ກອງປະຊຸມໄດ້ສິ້ນສຸດລົງດ້ວຍການນໍາສະເຫນີຍຸດທະສາດທີ່ຖືກອອກແບບມາເພື່ອເພີ່ມປະສິດທິພາບຂອງໂຄງການ NIPN, ລວມທັງການສະເຫນີແຜນສໍາລັບການປັບປຸງໃນອະນາຄົດ ໃນການຄຸ້ມຄອງວຽກງານທາງດ້ານໂພຊະນາການໃນສາມປະເທດ.
ການຢ້ຽມຢາມແລະແລກປ່ຽນບົດຮຽນໃນຄັ້ງນີ້, ໄດ້ຮັບການສະໜັບສະໜູນຈາກສະຫະພາບເອີຣົບ, ອົງການ UNICEF, ແລະ ລັດຖະບານ ສປປ ລາວ, ໄດ້ຍົກໃຫ້ເຫັນເຖິງຄວາມສຳຄັນຂອງການຮ່ວມມືສາກົນໃນການແກ້ໄຂບັນຫາສິ່ງທ້າທາຍດ້ານໂພຊະນາການໃນທົ່ວໂລກ ໂດຍການການແລກປ່ຽນປະສົບການ, ຖອດຖອນບົດຮຽນ, ຮັດແໜ້ນສາຍພົວພັນລະຫວ່າງລັດຖະບານ ແລະ ບັນດາພາກສ່ວນກ່ຽວຂ້ອງທີ່ສຳຄັນ, ການຢ້ຽມຢາມໄດ້ເນັ້ນໜັກເຖິງບົດບາດອັນສຳຄັນຂອງການນຳພາ ເປັນຕົ້ນແມ່ນທ່ານຮອງເຈົ້າແຂວງສາລະວັນ ທີ່ໄດ້ສະແດງໃຫ້ເຫັນເຖິງຜົນສຳເລັດຂອງລະບົບຂໍ້ມູນຂ່າວສານດ້ານໂພຊະນາການຈາກການຊີ້ນຳໆຢ່າງໃກ້ຊິດ. ໂດຍລວມເເລ້ວ, ຜົນຂອງການເເລກປ່ຽນຢ້ຽມຢາມໃນຄັ້ງນີ້ເຮັດໃຫ້ຜູ້ເຂົ້າຮ່ວມມີຄວາມມຸ່ງຫມັ້ນທີ່ເພີ່ມຂຶ້ນໃນການປັບປຸງການຕັດສິນໃຈໂດຍອີງໃສ່ຂໍ້ມູນແລະສ້າງຄວາມກ້າວຫນ້າທາງດ້ານໂພຊະນາການທີ່ດີກວ່າໃນປະເທດຂອງເຂົາເຈົ້າ.