ໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ໄດ້ດໍາເນີນການຝຶກອົບຮົມດ້ານການວິເຄາະຂໍ້ມູນ ແລະ ນະໂຍບາຍໃຫ້ແກ່ແຂວງສາລະວັນ ແລະ ເຊກອງ ໃນລະຫວ່າງວັນທີ 23-27 ກັນຍາ 2024. ເຊິ່ງໄດ້ຈັດຂຶ້ນທີ່ພະແນກແຜນການ ແລະ ການລົງທຶນແຂວງເຊກອງ, ການເຝິກອົບຮົມດັ່ງກ່າວໄດ້ມີຜູ້ຕາງໜ້າຈາກ ບັນດາຂະເເໜງການທີ່ກ່ຽວຂ້ອງເຂົ້າຮ່ວມເຊັ່ນ: ຂະແໜງສາທາລະນະສຸກ, ສຶກສາ, ກະສິກຳ ແລະ ຂະແໜງແຜນການ.
ໃນພິທີເປີດການຝຶກອົບຮົມດັ່ງກ່າວໃຫ້ກຽດເປັນປະທານຮ່ວມໂດຍ ທ່ານ ບົວຈອນ ແກ້ວປະດັບສິນ ຮອງຫົວໜ້າພະແນກແຜນການ ແລະ ການລົງທຶນ ແຂວງເຊກອງ ພ້ອມດ້ວຍ ທ່ານ ວຽງຄອນ ບົວພະຈັນ ຫົວໜ້າພະແນກຄົ້ນຄວ້ານະໂຍບາຍສັງຄົມ ເເລະ ຫຼຸດຜ່ອນຄວາມທຸກຍາກ, ສະຖາບັນຄົ້ນຄວ້າວິໄຈການພັດທະນາ ກະຊວງແຜນການ ແລະ ການລົງທຶນ ແລະ ທ່ານ ໂຄວາຣານ ກຸມມາຣານ , ຜູ້ຊ່ຽວຊານດ້ານໂພຊະນາການຈາກອົງການ UNICEF ປະຈຳ ສປປ ລາວ.
ໃນໄລຍະເວລາຫ້າມື້ຂອງການຝຶກອົບຮົມ, ຜູ້ເຂົ້າຮ່ວມຝຶກອົບຮົມໄດ້ຮຽນຮູ້ບັນດາຫົວຂໍ້ທີ່ກວມເອົາບັນຫາທີ່ສໍາຄັນກ່ຽວກັບໂຄງການເຊັ່ນ: ໂຄງຮ່າງການຄຸ້ມຄອງໂຄງການ NIPN ໃນຂັ້ນເເຂວງ, ການຄຸ້ມຄອງ ແລະ ວິເຄາະຂໍ້ມູນ, ກອບການຕິດຕາມກວດກາແລະການປະເມີນຜົນ, ການຕັ້ງບັນຫາທາງດ້ານໂພຊະນາການ ເເລະ ການວາງແຜນໂດຍອີງໃສ່ຫຼັກຖານ. ການຝຶກອົບຮົມແມ່ນໄດ້ເນັ້ນໃສ່ການປະຕິບັດຕົວຈິງ, ໂດຍຜູ້ເຂົ້າຮ່ວມໄດ້ຮຽນຮູ້ການນໍາໃຊ້ເຄື່ອງມືແບບງ່າຍໆເຊັ່ນ: Excel ສໍາລັບການວິເຄາະຂໍ້ມູນສະເພາະຂອງຂະແຫນງການຂອງຕົນເພື່ອກໍານົດແລະແກ້ໄຂບັນຫາທີ່ກ່ຽວຂ້ອງກັບໂພຊະນາການຢ່າງມີປະສິດທິພາບ.
ໃນພິທີປິດການຝຶກອົບຮົມ, ທ່ານ ນາງ ສີສະຫວັນ ດີດາຣາວົງ ຮອງຫົວໜ້າສະຖາບັນຄົ້ນຄວ້າວິໄຈການພັດທະນາ, ກະຊວງແຜນການ ເເລະ ການລົງທຶນ ໄດ້ຍົກໃຫ້ເຫັນເຖິງຄວາມສຳຄັນຂອງການຝຶກອົບຮົມ ແລະ ຮຽກຮ້ອງໃຫ້ນັກສຳມະນາກອນນຳໃຊ້ທັກສະທີ່ໄດ້ຮັບຈາກການຝຶກອົບຮົມເຂົ້າໃນວຽກງານຂອງຕົນ. ນອກຈາກນັ້ນຍັງໄດ້ເນັ້ນໜັກເຖິງຄວາມຈຳເປັນຂອງການເພີ່ມທະວີການປະສານງານລະຫວ່າງບັນດາຂະແໜງການ, ໂດຍສະເພາະແມ່ນລະຫວ່າງກອງເລຂາ NIPN ແລະ ຄະນະວິຊາການຂອງໂຄງການ NIPN ໃນຂັ້ນແຂວງ, ເພື່ອຮັບປະກັນການປະຕິບັດວຽກງານດ້ານໂພຊະນາການໃຫ້ປະສົບຜົນສຳເລັດ.
ການສ້າງຄວາມອາດສາມາດເປັນບາດກ້າວສຳຄັນໃນການປັບປຸງຜົນໄດ້ຮັບດ້ານໂພຊະນາການຢູ່ແຂວງສາລະວັນ ແລະ ແຂວງເຊກອງ ໂດຍຜ່ານການເພີ່ມທະວີດ້ານການສ້າງຄວາມອາດສາມາດ, ການວິເຄາະຂໍ້ມູນ ແລະ ການວາງແຜນນະໂຍບາຍຕາມຫຼັກຖານຢູ່ໃນຂັ້ນເເຂວງ.