ໂຄງການສ້າງຖານຂໍ້ມູນຂ່າວສານແຫ່ງຊາດດ້ານໂພຊະນາການ (NIPN) ໄດ້ດໍາເນີນການຝຶກອົບຮົມເຂັ້ມ ກ່ຽວກັບການວິເຄາະຂໍ້ມູນ ແລະ ການວິເຄາະນະໂຍບາຍໃຫ້ເເກ່ແຂວງອຸດົມໄຊ ເເລະ ຜົ້ງສາລີໃນລະຫວ່າງວັນທີ 18 – 22 ພະຈິກ 2024. ໂດຍໄດ້ຈັດຂຶ້ນທີ່ພະແນກແຜນການ ແລະ ການລົງທຶນ ແຂວງອຸດົມໄຊ, ການຝຶກອົບຮົມດັ່ງກ່າວແມ່ນເຂົ້າຮ່ວມໂດຍຕົວເເທນ ຈາກຂະແໜງສາທາລະນະສຸກ, ສຶກສາ, ກະສິກຳ ແລະ ຂະແໜງແຜນການ.
ພິທີເປີດການຝຶກອົບຮົມເເມ່ນໄດ້ຮັບກຽດເປັນປະທານຮ່ວມຂອງທ່ານ ນາງ ມາລີ ປັນຍາສັກ, ຮອງຫົວໜ້າພະເເນກແຜນການ ເເລະ ການລົງທຶນເເຂວງອຸດົມໄຊ ເເລະ ທ່ານ ວຽງຄອນ ບົວພະຈັນ , ຫົວໜ້າພະແນກຈາກສະຖາບັນຄົ້ນຄວ້າວິໄຈການພັດທະນາ, ກະຊວງແຜນການ ແລະ ການລົງທຶນ ເຊິ່ງໃນການຝຶກອົບຮົມຕະຫຼອດໄລຍະເວລາ 5 ວັນ, ຜູ້ເຂົ້າຮ່ວມໄດ້ຄົ້ນຄວ້າໃນຫົວຂໍ້ທີ່ສຳຄັນຕ່າງໆໄດ້ເເກ່:
- ພາບລວມກ່ຽວກັບພາລະບົດບາດຂອງໂຄງການ NIPN ໃນລະດັບສູນກາງ ແລະ ລະດັບເເຂວງ
- ການກຳນົດເປົ້າໝາຍ ແລະ ວັດຖຸປະສົງ
- ເຕັກນິກການຄຸ້ມຄອງຂໍ້ມູນ ແລະການວິເຄາະຂໍ້ມູນ
- ກອບການຕິດຕາມກວດກາ ແລະ ການປະເມີນຜົນ
- ການກໍານົດບັນຫາທາງດ້ານໂພຊະນາການ
- ຍຸດທະສາດການວາງແຜນງານທີ່ອີງໃສ່ຫຼັກຖານ
ການຝຶກອົບຮົມໄດ້ເນັ້ນໃສ່ການປະຕິບັດຕົວຈິງ. ຜູ້ເຂົ້າຮ່ວມໄດ້ຝຶກຝົນຄວາມສາມາດຂອງເຂົາເຈົ້າໂດຍການນໍາໃຊ້ ໂປຣແກມ Excel ໃນການວິເຄາະຂໍ້ມູນສະເພາະຂອງຂະແໜງການຂອງຕົນເພື່ອກຳນົດບັນຫາ ແລະ ວິທີການແກ້ໄຂບັນຫາກ່ຽວກັບໂພຊະນາການ. ນອກຈາກນີ້ຜູ້ເຂົ້າຮ່ວມຍັງໄດ້ຮຽນຮູ້ວິທີການ ນຳເອົາຜົນໄດ້ຮັບຈາກການວິເຄາະຂໍ້ມູນມາສ້າງເປັນ ຄໍາແນະນໍາທາງດ້ານນະໂຍບາຍ.
ໃນບົດກ່າວປີດຂອງ, ທ່ານ ປອ ສິດທິຣົດ ຣາຊະພົນ ຫົວໜ້າສະຖາບັນຄົ້ນຄວ້າວິໄຈການພັດທະນາ, ກະຊວງແຜນການ ເເລະ ການລົງທຶນ ໄດ້ກ່າວຢ້ຳຄືນເຖິງຄວາມສຳຄັນຂອງການຝຶກອົບຮົມ ແລະ ຮຽກຮ້ອງໃຫ້ ນັກສຳມະນາກອນ ຈົ່ງນຳເອົາທັກສະທີ່ໄດ້ຮັບຈາກການຝຶກອົບຮົມເຂົ້າໄປນຳໃຊ້ໃນການປະຕິບັດໜ້າທີ່ຂອງຕົນ. ນອກຈາກນັ້ນຍັງໄດ້ເນັ້ນໜັກເຖິງຄວາມຈຳເປັນໃນການເພີ່ມທະວີການປະສານງານລະຫວ່າງບັນດາຂະແໜງການ ເເລະ ຕີລາຄາສູງຕໍ່ຜົນສຳເລັດຂອງການຝຶກອົບຮົມໃນຄັ້ງນີ້.
ການສ້າງຄວາມອາດສາມາດເປັນບາດກ້າວອັນສຳຄັນໃນການປັບປຸງຜົນໄດ້ຮັບດ້ານໂພຊະນາການຢູ່ເຂດພາກເໜືອ, ໂດຍສະເພາະຢູ່ແຂວງອຸດົມໄຊ ແລະ ແຂວງຜົ້ງສາລີ. ໂດຍການເສີມຂະຫຍາຍຄວາມອາດສາມາດໃນການວິເຄາະຂໍ້ມູນແລະການສົ່ງເສີມການວາງນະໂຍບາຍໂດຍອີງໃສ່ຫຼັກຖານໃນຂັ້ນເເຂວງ, ໂຄງການ NIPN ມີຈຸດປະສົງເພື່ອຊຸກຍູ້ການປ່ຽນແປງທີ່ມີຄວາມສຳຄັນໃນການແກ້ໄຂສິ່ງທ້າທາຍທາງດ້ານໂພຊະນາການ.
